Azərbaycan Ağır Atletika Federasiyası

Məhəmməd Rüstəmli Avropa birinciliyində 2 gümüş və 1 bürünc medal qazandı

Mehman Rasulov — Fri, 21 Aug 2026 13:56:21 +0000

Atletimiz Məhəmməd Rüstəmli Kosovonun Priştina şəhərində keçirilən U 15 və yeniyetmələrin Avropa birinciliyində 2 gümüş və 1 bürünc medal qazanıb. Birdən qaldırma hərəkətində 91 kq çəkini ram edən Məhəmməd qitə miqyaslı yarışın bürünc mükafatını əldə edib. 55 kq çəki dərəcəsində yarışan Rüstəmli təkanla qaldırma növündə daha yaxşı çıxış edib. Bu dəfə 110 kq ağırlığı başı üzərinə qaldıran təmsilçimiz Avropa birinciliyinin gümüş medalına sahib olub. Beləliklə iki hərəkətin cəmində 201 kq nəticə göstərən Məhəmməd Rüstəmli toplamda da fəxri kürsünün ikinci pilləsinə yüksəlib.
Qeyd edək ki, medalçıların mükafatlandırma mərasimində AAF-ın vitse-prezidenti Firdovsi Umudov da iştirak edib.
Təbrik edirik!

Nuray Əbilova Avropa birinciliyində 2 medal qazandı

Mehman Rasulov — Fri, 21 Aug 2026 11:54:11 +0000

Atletimiz, İslam Həmrəyliyi Oyunlarının bürünc medalçısı Nuray Əbilova, Kosovonun Priştina şəhərində keçirilən U 15 və yeniyetmələrin Avropa birinciliyində 2 medal qazanıb. Birdən qaldırma hərəkətində 70 kq çəkini ram edən Nuray, təkanla qaldırma hərəkətində 85 kq çəkinin öhdəsindən gələrək bürünc medal əldə edib. Əbilova toplamda da 155 kq nəticə ilə növbəti bürünc medalı boynundan asıb.
Təbrik edirik!

F.Umudov Avropa birinciliyinə yollanacaq heyət üzvləri ilə görüşüb

Mehman Rasulov — Fri, 14 Aug 2026 13:16:12 +0000

20-27 avqust 2026-cı il tarixlərində Kosovonun Priştina şəhərində ağırlıqqaldırma üzrə U-15 və yeniyetmələr arasında Avropa birinciliyi keçiriləcək. Yarışda ölkəmiz 11 atletlə təmsil olunacaq. Bugün AAF-ın vitse-prezidenti Firdovsi Umudov qitə miqyaslı yarışa yollanacaq heyət üzvləri ilə görüşüb. İdmançılara məsul yarışda uğurlar arzulayan Firdovsi Umudov, onların hər birindən layiqli mübarizə gözlədiyini bildirib. O qeyd edib ki, ölkə rəhbərliyi tərəfindən idmanın və idmançıların, ələlxüsus yeniyetmə atletlərin inkişafına xüsusi həssaslıqla yanaşılır. Gənclər və İdman Nazirliyi, eləcə də AAF tərəfindən yarışa hazırlıq dövründə komandaya bütün zəruri şərait yaradilib. Bunun müqabilində atletlər qarşısında qoyulan əsas məqsəd Avropa birinciliyində ölkəmizi layiqincə təmsil etməkdir. Uğur qazanmaq üçün isə komanda daxili nizam-intizam qaydalarına ciddi şəkildə riayət edilməli və bu mənada Azərbaycan yığması digər kollektivlərə nümunə olmalıdır.
Məlumat üçün deyək ki, Avropa birinciliyində ölkəmizi 8 oğlan və 3 qız idmançı təmsil edəcək. Qızların yarışında Şəbnəm Həsənzadə (49 kq), Nuray Əbilova (49 kq) və Hənifə Məhərrəmli (61 kq) körpücük üzərinə çıxacaqlar.
Oğlanların yarısında Məhəmməd Rüstəmli (55 kq), İsa Hüseynov (60 kq), Musab Məmmədtağıyev (70 kq), Kamran Xappayev (70 kq), Lətif Əliyev (75 kq), Əbdulhüseyn Hüseynov (75 kq), Fəxrəddin Allahverdiyev ( 85 kq) və Elcan Əliyev (85 kq) bacarığını nümayiş etdirəcək.
Komandamızı yarışa baş məşqçi Sərdar Həsənov, böyük məşqçi Asif Məmmədov və məşqçi Əfqan Bayramov hazırlayıblar. Onlarla yanaşı Kosovoya 2 hakimimiz – Kənan Mustafayev və Səbinə Rzayeva da yollanacaq.

AAF prezidenti Kamran Nəbizadə Asiya Ağırlıqqaldırma Federasiyasının prezidenti Muhammed Yousef Al Mana ilə görüşüb

Mehman Rasulov — Tue, 23 Jun 2026 14:56:40 +0000

Azərbaycan Ağırlıqqaldırma Federasiyasının prezidenti Kamran Nəbizadə, Bakıda səfərdə olan Asiya Ağırlıqqaldırma Federasiyasının və Qətər Ağırlıqqaldırma Federasiyasının prezidenti Muhammed Yousef Al Mana ilə görüşüb. AAF-ın vitse-prezidenti Firdovsi Umudovun da iştirak etdiyi görüşdə bir sıra məsələlərə dair fikir mübadiləsi aparılıb. Səfəri haqqında məmnunluqla danışan qonaq, Azərbaycanın nümunəvi idman ölkəsi olduğunu diqqətə çatdırıb. AAF prezidenti Kamran Nəbizadə, Muhammed Yousef Al Mananı Bakıda görməkdən məmnun olduğunu bildirib. Federasiya prezidenti qeyd edib ki, Azərbaycanda idman sahəsinə, o cümlədən ağırlıqqaldırma növünün inkişafına dövlət səviyyəsində qayğı göstərilir. Kamran Nəbizadə xatırladıb ki, Azərbaycan, Beynəlxalq Ağırlıqqaldırma Federasiyasının Avropa üzrə Mərkəzi statusuna sahibdir və bu mənada qarşılıqlı təmasların genişləndirilməsi xüsusi əhəmiyyət daşıyır. Bu müddət ərzində bir neçə ölkənin idmançılarının Bakıda təlim-məşq toplanışı keçdiyini vurğulayan Kamran Nəbizadə, təcrübə mübadiləsinin vacibliyini diqqətə çatdırıb. Məhsuldar keçən görüş qarşılıqlı fikir mübadiləsi ilə davam edib.

Daha 2 çəki dərəcəsində qaliblər müəyyənləşib

Mehman Rasulov — Mon, 22 Jun 2026 14:48:22 +0000

Məktəblilərin Respublika İdman Olimpiadasında ağırlıqqaldırma növü üzrə daha 2 çəkidə qalib və mükafatçıların adlarına aydınlıq gəlib. Fərqlənmiş idmançılara mükafatları Azərbaycan Ağırlıqqaldırma Federasiyasının prezidenti Kamran Nəbizadə, vitse-prezident Firdovsi Umudov, həmçinin ARGİN-in Olimpiya və Paralimpiya idman növləri sektorunun baş məsləhətçisi Yusif Hüseynov təqdim ediblər.

Nəticələr: 56 kq çəki dərəcəsi

1-ci yer: Sərdar Alməmmədov – toplamda 168 kq (76 kq + 92 kq)
2-ci yer: Mehdi Məmmədov – toplamda 158 kq (68 kq + 90 kq)
3-cü yer: İlham Əliyev – toplamda 155 kq (70 kq + 85 kq)

Nəticələr: 60 kq çəki dərəcəsi

1-ci yer: Məhəmməd Rüstımli – toplamda 198 kq (88 kq + 110 kq)
2-ci yer: Mirmöhsüm Tağızadə – toplamda 182 kq (84 kq + 98 kq)
3-cü yer: Amin Quluzadə – toplamda 158 kq (68 kq + 90 kq)

Qeyd edək ki, ağırlıqqaldırma yarışlarına sabah yekun vurulacaq. Son gün atletlər 4 çəki dərəcəsində mübarizə aparacaqlar.

Rza Heydərov birinci oldu

Mehman Rasulov — Mon, 22 Jun 2026 11:20:03 +0000

Məktəblilərin Respublika İdman Olimpiadasında ağırlıqqaldırma növü üzrə 52 kq çəki dərəcəsində qalib və mükafatçıların adlarına aydınlıq gəlib.

Bu çəkidə qızıl medala Lənkəran idmançısı Rza Heydərov layiq görülüb. Rza 163 kq (76 kq + 87 kq) nəticə ilə yarışı birinci pillədə başa vurub.

Naxçıvan idmançısı Ümid Hüseynov iki hərəkətin cəmində göstərdiyi 134 kq (61 kq + 73 kq) nəticə ilə gümüş medala yiyələnib.

52 kq çəki dərəcəsində bürünc medalı digər Lənkəran idmançısı Roman Hüseynzadə əldə edib. Roman toplamda 118 kq (50 kq + 68 kq) nəticəyə imza atıb.

Ömər Abdalov qızıl medal qazandı

Mehman Rasulov — Mon, 22 Jun 2026 09:01:40 +0000

Məktəblilərin Respublika İdman Olimpiadasında ağırlıqqaldırma növündə oğlanların mübarizəsi davam edir. İkinci yarış günü körpücük üzərinə ilk olaraq çəkisi 48 kq-a qədər olan yeniyetmələr çıxıblar.

Bu çəkidə qızıl medala Qazax idmançısı Ömər Abdalov layiq görülüb. Ömər 130 kq (57 kq + 73 kq) nəticə ilə yarışı birinci pillədə tamamlayıb.

Lənkəran təmsilçisi Mənsur Ağayev iki hərəkətin cəmində göstərdiyi 128 kq (57 kq + 71 kq) nəticə ilə gümüş medal qazanıb.

48 kq çəki dərəcəsində bürünc medalı Bakı idmançısı Elnur Əyyubov əldə edib. Əyyubov toplamda 121 kq (52 kq + 69 kq) nəticəyə imza atıb.

Qeyd edək ki, ağırlıqqaldırma yarışlarında atletlər bugün 4 çəki dərəcəsində mübarizə aparır

Elçin Muradov qızıl medal qazandı

Mehman Rasulov — Sun, 21 Jun 2026 13:38:43 +0000

Məktəblilərin Respublika İdman Olimpiadasında ağırlıqqaldırma növündə oğlanların mübarizəsi başlayıb. İlk yarış günü çəkisi 44 kq-a qədər olan yeniyetmələr bacarığını nümayiş etdirib.

Bu çəkidə qızıl medala Qazax idmançısı Elçin Muradov layiq görülüb. Elçin 110 kq (49 kq + 61 kq) nəticə ilə yarışı birinci pillədə tamamlayıb.

Lənkəran təmsilçisi Məmmədəli Məmmədov iki hərəkətin cəmində göstərdiyi 94 kq (41 kq + 53 kq) nəticə ilə gümüş medal qazanıb.

44 kq çəki dərəcəsində bürünc medalı Bakı idmançısı Abuzər Sultanov əldə edib. Sultanov toplamda 93 kq (43 kq + 50 kq) nəticəyə imza atıb.

Qeyd edək ki, ağırlıqqaldırma yarışlarında 100-dən artıq atlet 3 gün ərzində qalib və mükafatçıların adlarına aydınlıq gətirəcəklər.

Qızların yarışında mükafatçıların adlarına aydınlıq gəldi

Mehman Rasulov — Sun, 21 Jun 2026 10:05:06 +0000

Məktəblilərin Respublika İdman Olimpiadasında ağırlıqqaldırma yarışlarına start verilib. Şüvəlan Ağırlıqqaldırma Akademiyasında keçirilən yarışda ilk olaraq qızlar mübarizəyə qoşulublar.
Zəriflərin yarışında qızıl medala Qazax idmançısı Hənifə Məhərrəmli layiq görülüb. Məhərrəmli toplamda 160 kq (73 kq + 87 kq) nəticə ilə birinci olub. Gəncə təmsilçisi Zeynəb Həsənova 134 kq (63 kq + 71 kq) göstərici ilə fəxri kürsünün ikinci pilləsinə qalxıb. Ən güclü üçlüyü paytaxt idmançısı Zeynəb Bəkirli tamamlayıb. O iki hərəkətin cəmində 116 kq (53 kq + 63 kq) ağırlığı ram edib.
Qeyd edək ki iştirakçıların göstərdiyi nəticələr sinkler cədvəli üzrə hesablanıb.
Ağırlıqqaldırma yarışlarında 100-dən artıq atlet 3 gün ərzində qalib və mükafatçıların adlarına aydınlıq gətirəcəklər.

Ağırlıqqaldırma üzrə Azərbaycan çempionatına yekun vurulub

Mehman Rasulov — Sun, 15 Mar 2026 11:15:55 +0000

Ağırlıqqaldırma üzrə Azərbaycan çempionatına yekun vurulub. Son yarış günü daha 3 çəki dərəcəsində qaliblərin adlarına aydınlıq gəlib.

Qasım İsmayılov 79 kq çəki dərəcəsində toplamda 291 kq (126 kq+165 kq) nəticə ilə birinci olub.

Akif Abdullayev 88 kq çəki dərəcəsində toplamda 321 kq (146 kq+175 kq) nəticə ilə qızıl medala layiq görülüb.

Məmməd Əhmədzadə 94 kq çəki dərəcəsində toplamda 296 kq (135 kq + 165 kq) nəticə ilə qələbəni bayram edib.