Qalereya – Azərbaycan Ağır Atletika Federasiyası

AAF “2024-cü ildə uğurlu beynəlxalq fəaliyyətə görə” nominasiyasında 3-cü yeri tutub

Mehman Rasulov — Fri, 10 Jan 2025 06:30:38 +0000

Gənclər və İdman Nazirliyi ilin idman yekunları ilə bağlı qala mərasimi təşkil edib. Tədbirə idman təşkilatlarının, federasiyaların, media qurumlarının rəhbərləri, idmançılar, məşqçilər və idman ictimaiyyətinin nümayəndələri qatılıblar. Heydər Əliyev Fondunun vitse-prezidenti Leyla Əliyeva və Bakı Media Mərkəzinin rəhbəri Arzu Əliyeva da mərasimdə iştirak ediblər.

İlk olaraq Gənclər və idman naziri Fərid Qayıbov 2024-cü ilin Azərbaycan idmanı üçün uğurlu keçdiyini qeyd edib və bu münasibətlə federasiya rəhbərlərini, idmançıları, məşqçiləri, idman ictimaiyyətini təbrik edib.

Azərbaycan Ağırlıqaldırma Federasiyasının prezidenti Kamran Nəbizadə, vitse-prezident Firdovsi Umudov və son dünya çempionatının gümüş mükafatçısı Dadaş Dadaşbəylinin də dəvət olunduğu tədbirdə AAF-ın fəaliyyəti də qiymətləndirilib.

Seçimlərə əsasən Azərbaycan Ağırlıqqaldırma Federasiyası “2024-cü ildə uğurlu beynəlxalq fəaliyyətə görə” nominasiyasında 3-cü yeri tutub.

Təbrik edirik!

Tovuz və Qazax rayonlarında yeni ağır atletika zalları idmançıların istifadəsinə verilib

Kenan Mesteliyev — Sun, 25 Sep 2022 12:47:36 +0000

Tovuz və Qazax rayonlarında yeni ağır atletika idman zalları idmançıların istifadəsinə verilib. Yeni zallarda “Uğur” (Tovuz) və “Göyəzən” (Qazax) ağır atletika klublarının idmançıları təcrübəli məşqçilərin rəhbərliyi altında müxtəlif yaş qrupları üzrə sistemli məşqlər keçirlər. Məşq zalları yüksək standartlara uyğun avadanlıqlarla təchiz olunub. Zövqlə dizayn edilmiş zallarda körpücüklər, məşq üçün dəstlər, fiziki hazırlığı yüksək səviyyədə saxlamaq üçün avadanlıqlar yerləşdirilib. Yeni idman zallarda havalandırma sistemləri qurulub, paltardəyişmə, duş kabinaları, sauna otaqları, məşqçilərin iş otaqları yaradılıb, idmançıların istirahəti və bərpa prosesi üçün hər cür şərait formalaşdırılıb.

Bölgələrdə ən müasir standartlara cavab verən ağır atletika zallarının istifadəyə verilməsi bu idman növünün gənclər arasında populyarlaşmasını təmin edir. Maddi-texniki bazanın yaxşılaşdırılması artıq ağır atletika ilə məşğul olmaq istəyənlərin sayını artırıb. Bölgələrdə yeni idman zallarının açılması ağır atletlərin müxtəlif səviyyəli yarışlara, o cümlədən beynəlxalq turnirlərə hazırlığını təşkil etməyə, o cümlədən yığma komandaların təlim-məşq toplanışlarının daha yaxşı təşkil olunmasına imkan verir.

Regionlarda daha bir neçə zalın açılışı olub

Kenan Mesteliyev — Sun, 25 Sep 2022 10:33:58 +0000

Goranboy Olimpiya İdman Kompleksinin nəzdində, Gəncə şəhərində, Azərbaycan Dövlət Aqrar Universitetinin nəzdində, eləcə də Samux şəhərində ağır atletika zalları istifafəyə verilib.

Zalların açılışında kənd təsərrüfatı naziri, Azərbaycan Ağır Atletika Federasiyasının prezidenti İnam Kərimov, gənclər və idman naziri Fərid Qayıbov və Milli Olimpiya Komitəsinin baş katibi Azər Əliyev iştirak ediblər.

Yeni istifadəyə verilən zallarda yaradılmış şəraitlə tanış olan qonaqlar idmançı və məşqçilərlə fikir mübadiləsi aparıblar. Söhbət zamanı regionlarda bu idman növünün inkişafının əhəmiyyəti və geniş təbliği xüsusi vurğulanıb.

Səfər çərçivəsində nazir Fərid Qayıbov Şəki şəhərində “Buta” məktəbəqədər təhsil müəssisəsində istifadəyə veriləcək ağır atletika zalı və İsmayıllı şəhərində Uşaq-Gənclər Şahmat İdman Məktəbinin nəzdində mövcud ağır atletika zalının fəaliyyəti ilə də tanış olub.

“Muğan” Ağır Atletika Klubunun açılış mərasimi keçirilib

Kenan Mesteliyev — Fri, 29 Jul 2022 09:45:05 +0000

Bu gün Sabirabad şəhərində “Muğan” Ağır Atletika Klubunun açılışı olub. Açılışda Azərbaycan Ağır Atletika Federasiyasının prezidenti İnam Kərimov, Gənclər və İdman naziri Fərid Qayıbov, nazir müavini Mariana Vasileva, Sabirabad rayon İcra Hakimiyyətinin başçısı Siraqəddin Cabbarov, millət vəkili Kamal Cəfərov və digər şəxslər iştirak ediblər. Qonaqlar burada yaradılan şəraitlə tanış olub, fikirlərini bölüşüb, tövsiyələrini verib, uğurlar arzulayıblar.

“Muğan” Ağır Atletika Klubu bu il yaranıb. Klubun bazası özəl sektora məxsus olan idman zalı üçün uyğunlaşdırılmış və tam yeni təmirdən çıxmış 2 zaldan ibarətdir. Ağır atletika ilə məşğul olmaq üçün bütün avadanlıqlarla təmin olunmuş xüsusi zal 150 kv.m sahədən, ikinci zal isə 120 kv.m sahədən ibarət olmaqla, trenajor avadanlıqları ilə təmin olunub. Ümumilikdə, binanın sahəsi 396 kv.m-dir.

Antidopinq seminarı keçirilib

Kenan Mesteliyev — Thu, 28 Jul 2022 13:03:46 +0000

İyul ayının 28-də Şüvəlan qəsəbəsində yerləşən Ağır Atletika Akademiyasında Azərbaycan Ağır Atletika Federasiyası (AAAF) və Azərbaycan Milli Antidopinq Agentliyinin (AMADA) birgə təşkilatçılığı ilə antidopinq seminarı keçirilib. Tədbirdə ağır atletika üzrə qadın, yeniyetmə, gənclər və kişilərdən ibarət yığma komandaların üzvləri, məşqçilər, texniki heyətin digər üzvləri iştirak ediblər. Seminarı AMADA-nın Təhsil Şöbəsinin müdiri Lalə Hacıyeva aparıb.

Əvvəlcə antidopinq qaydaları ilə bağlı yazılı ön sorğu aparılıb, sonra geniş məlumatlandırmaya keçilib. İştirakçılara dopinqdən istifadənin törətdiyi fəsadlar və bunun hüquqi nəticələri, Antidopinq Qayda Pozuntuları, dopinq nəzarəti prosesi, Terapevtik İstifadə üçün İstisnalar, qadağan edilmiş maddələrin siyahısı, onun tərtib olunma meyarları, yarış vaxtı və ondan kənarda test götürülmə qaydaları, idmançıların məkan məlumatları, ADAMS sistemi və digər vacib məqamlar barədə geniş məlumat verilib. Qeyd olunanlar eyni zamanda proyektor vasitəsilə əyani şəkildə göstərilib. Seminar interaktiv keçirilib, iştirakçılar onları maraqlandıran sualları verərək cavab alıb, maraqlı müzakirələr aparılıb.

Milli qəhrəman Fəxrəddin Şahbazovun xatirəsinə həsr olunmuş turnir keçirildi

Kenan Mesteliyev — Sat, 21 Dec 2019 11:28:02 +0000

Dekabrın 21-də Şüvəlan qəsəbəsindəki Ağır Atletika Akademiyasının yarış zalında Milli Qəhrəman Fəxrəddin Şahbazovun xatirəsinə həsr olunmuş ağır atletika üzrə XIX açıq turnir keçirilib. Bakı Şəhər Gənclər və İdman Baş İdarəsi və Azərbaycan Ağır Atletika Federasiyasının təşkilatçılığı ilə baş tutan yarışda Azərbaycanın paytaxt və regionlarda fəaliyyət göstərən idman təşkilatlarından idmançılar iştirak ediblər.
Turnirin keçirilməsində məqsəd Milli Qəhrəman Fəxrəddin Şahbazovun timsalında vətən uğrunda şəhid olmuş soydaşlarımızın xatirəsinin əziz tutulması, onun həyat yolunun və idman fəaliyyətinin böyüməkdə olan yeni nəsil idmançılar və gənclər arasında təbliğ olunması, yerlərdə ağır atletika idman növünün təbliği və inkişaf etdirilməsi, ən güclü idmançıların aşkar olunması, idmançıların ustalıq səviyyəsinin artırılmasıdır.
Yarışın açılış mərasimində Bakı Şəhər Gənclər və İdman Baş İdarəsinin rəisi Raqif Abbasov çıxış edib. O, hər kəsi salamlayaraq, bu birinciliyin uzun illərdir keçirildiyini və yüksək səviyyədə təşkil edildiyini qeyd edib: “Biz Azərbaycan Ağır Atletika Federasiyası və Azərbaycan Televiziyası ilə birlikdə bu yarışa daima diqqət yetirir, vacibliyini vurğulayırıq. Fəxrəddin Şahbazov öz həyat və fəaliyyəti ilə gənc nəsillərə bir nümunə olub. Bizim də məqsədimiz bu irsi bundan sonra da yaşatmaq və bu yarışlar vasitəsilə təbliğ etməkdir. Qəhrəmanımızı ailəsi də əmin olsun ki, biz gücümüz yetdikcə bu işi davam etdirəcək, Fəxrəddin Şahbazovun xatirəsini əziz tutacağıq”.
Daha sonra söz Azərbaycan Ağır Atletika Federasiyasının baş katibi Rizvan Rəsulova verilib. O da bildirib ki, milli qəhrəman Fəxrəddin Şahbazovun xatirəsinin hər il belə yarışlarla anılması böyük əhəmiyyət daşıyır: “İdmançılar beynəlxalq arenalarda Azərbaycanın təmsilçiləridirlər. Onların yetişdirilməsi, hazırlanması üçün kütləviliyin olması vacibdir və məhz bu cür turnirlərlə buna nail ola bilirik. Xüsusilə də öz həyatı, gördüyü işlərlə adından söz etdirmiş, həm bir peşəkar, həm də bir qəhrəman olaraq vətənə xidmət etmiş Fəxrəddin Şahbazovun xatirəsinə həsr olunmuş birinciliklə bunu etmək hamımız üçün əhəmiyyət daşıyır. Federasiya olaraq biz də bu iş üçün əlimizdən gələni edir, maksimum dəstək olur, həm yarışın təşkilində iştirak edir, həm də mərhumun ailəsinə diqqət yetiririk. Bu işləri bundan sonra da davam etdirəcəyik”.
Sonda milli qəhrəmanın həyat yoldaşı Nəsibə Şahbazova səhnəyə dəvət edilib, ona xatirə medalı və hədiyyələr təqdim edilib. O da öz növbəsində bu yarışın mütəmadi və yüksək səviyyədə təşkilini təqdir edib, əməyi olan hər kəsə təşəkkür edib.
Yarış açıq elan edilib, Azərbaycan Respublikasının Dövlət Himni səslənib.

Birinciliyə gəlincə, körpücük üzərinə ilk olaraq çəkisi 49 və 55 kq olan atletlər çıxıblar. Müvafiq olaraq toplam 136 kq (58+78) nəticə ilə Fuad Qədimov və toplam 190 kq (90+100) nəticə ilə Əvəz Tağıyev qızıl medala sahib çıxıblar. Sonrakı çəkilərdə – 61 kq-da 160 kq (70+90) nəticə ilə Hüseyn Azayev, 67 kq-da 208 kq (98+110) nəticə ilə Kamil Nəbiyev, 73 kq-da toplam 161 kq (76+85) nəticə ilə Novruz Muxtarlı, 81 kq-da 213 kq (96+117) nəticə ilə Canəli Əsədov, 89 kq-da toplam 245 kq (115+130) nəticə ilə Yaşar Mamayev və 96 kq-da toplam 216 kq (96+120) nəticə ilə Kənan Zamanov qalib gəliblər.

Təbrik edirik!

49 kq

N	Adı	İl	Şəhər	Klub	Çəki	Birdən	Təkanla	Toplam
1.	Qədimov Fuad	2005	Sumqayıt	Təhsil	48.7	58	78	136
2.	Quliyev Emil	2006	Bakı	Təhsil	47.0	60	70	130
3.	Arzumanov Yusif	2006	Bakı	Neftçi	49.0	41	60	101
4.	Mirzəyev İlkin	2005	Bakı	Təhsil	45.3	45	55	100

55 kq

N	Adı	İl	Şəhər	Klub	Çəki	Birdən	Təkanla	Toplam
1.	Tağıyev Əvəz	2002	Neftçala	Zirvə	53.2	90	100	190
2.	Kazımov Rəhim	2004	Xırdalan	Zirvə	53.7	64	80	144
3.	Quliyev Namik	2004	Neftçala	Zirvə	54.4	63	74	137
4.	Beydullayev Racib	2004	Xırdalan	Zirvə	52.4	55	72	127
5.	Sultanov Soltan	2004	Bakı	Təhsil	52.1	55	70	125
6.	Miriyev Sahil	2003	Cəlilabad	UGİM	51.6	57	62	119
7.	Quliyev Vüsət	2004	Sumqayıt	Zirvə	51.7	48	62	110
8.	Mərdanov Fərid	2006	Sumqayıt	MOİK-Z	55.0	45	57	102
9.	Nəzərov Elturan	2006	Bakı	Təhsil	52.8	39	43	82

61 kq

N	Adı	İl	Şəhər	Klub	Çəki	Birdən	Təkanla	Toplam
1.	Azayev Hüseyn	2003	Bakı	Təhsil	59.3	70	90	160
2.	Hüseynli Fizuli	2002	Sumqayıt	MOİK-Təh.	57.7	73	86	159
3.	Əliyev Sadiq	2003	Yevlax	UGİM	61.0	70	85	155
4.	Nəbiyev Ravil	2004	Bakı	Spartak	58.0	65	90	155
5.	Quliyev Elgün	2003	Bakı	Təhsil	57.1	55	70	125
6.	Qurbanov Yaşar	2006	Bakı	Spartak	60.4	53	66	119

67 kq

N	Adı	İl	Şəhər	Klub	Çəki	Birdən	Təkanla	Toplam
1.	Nəbiyev Kamil	2003	Bakı	Spartak	65.5	98	110	208
2.	Babayev Nuran	2004	Bakı	Təhsil	61.5	73	95	168
3.	Kərimov Elvin	2004	Bakı	Təhsil	66.0	71	93	164
4.	Məlikov Soltan	2004	Neftçala	Zirvə	61.4	65	90	155
5.	Əsədov Xoşbəxt	2003	Qobustan	MOİK	61.5	52	65	117

73 kq

N	Adı	İl	Şəhər	Klub	Çəki	Birdən	Təkanla	Toplam
1.	Novruz Muxtarlı	2002	Sumqayıt	Zirvə-T.	67.9	76	85	161
2.	Qasımzadə Ülvi	2003	Cəlilabad	UGİM	61.1	64	80	144
3.	Nuralıyev Namiq	2004	Neftçala	Zirvə	69.2	57	70	127
4.	Kəlbiyev İsa	2002	Cəlilabad	UGİM	67.3	55	63	118

81 kq

N	Adı	İl	Şəhər	Klub	Çəki	Birdən	Təkanla	Toplam
1.	Əsədov Canəli	2003	Qobustan	MOİK	74.8	96	117	213
2.	Nazim Məmmədov	2003	Bakı	Təhsil	77.3	91	110	201
3.	Cavidan Muxtarlı	2003	Sumqayıt	MOİK-T.	73.5	47	60	107

89 kq

N	Adı	İl	Şəhər	Klub	Çəki	Birdən	Təkanla	Toplam
1.	Yaşar Mamayev	2003	Neftçala	Zirvə	83.1	115	130	245
2.	Abdulrəşid Bayramov	2005	Abşeron	Zirvə	84.0	93	115	208
3.	Fuad Hümmətli	2004	Xırdalan	Zirvə	84.3	75	95	170

96 kq

N	Adı	İl	Şəhər	Klub	Çəki	Birdən	Təkanla	Toplam
1.	Kənan Zamanov	2003	Xırdalan	Zirvə	91.7	96	120	216
2.	Soltan Qasımzadə	2003	Bakı	Təhsil	89.5	70	90	160

ŞƏKİLLƏR 49 KQ VƏ 55 KQ

ŞƏKİLLƏR 61 KQ VƏ 67 KQ

ŞƏKİLLƏR 73 KQ, 81 KQ, 89 KQ, 96 KQ, 102 KQ VƏ +102 KQ

Tamaş Ayan: “Cahangir Əsgərov Azərbaycan ağır atletikasının inkişafı istiqamətində fantastik işlər görüb”

Kenan Mesteliyev — Fri, 21 Sep 2018 07:01:50 +0000

Sentyabrın 19-da Beynəlxalq Ağır Atletika Federasiyasının (IWF) prezidenti Tamaş Ayan Bakıya rəsmi səfərə gəlib. O, Azərbaycan Ağır Atletika Federasiyasının (AAAF) rəhbərliyi görüşüb, bir sıra məsələləri müzakirə edib. Dopinqlə mübarizə, atletlərin yetişdirilməsi və davamlı inkişafı üçün atılan addımlar, yaradılan şəraitin yüksək səviyyədə saxlanılması, həmçinin idmançılarımızın beynəlxalq yarışlarda qazandığı uğurlar haqda danışılıb. Ayan AAAF-ın fəaliyyətindən razılığını ifadə edib.

Sentyabrın 20-də isə “Four Seasons” otelində IWF prezidenti Tamaş Ayanın mətbuat konfransı keçirilib. AAAF-ın baş katibi Rizvan Rəsulovun da iştirak etdiyi mərasimdə media nümayəndələrinin sualları cavablandırılıb.

Əvvəlcə, Tamaş Ayan öz fikirlərini bölüşüb: “Bakıya səfərim qısamüddətlidir. Burada cüdo üzrə dünya çempionatı kimi mötəbər turnir başlayıb. Təəssüf ki, çox qala bilməyəcəm. Azərbaycan xalq olaraq, ağır atletika idmanını sevir. Kifayət qədər yaxşı nəticələr olub. Əfsuslar olsun, 2008 və 2012-ci il Yay Olimpiya Oyunlarında iştirak edən bir sıra ağır atletlərdən götürülmüş nümunələr müsbət nəticə verib və cəzalar tətbiq olunub. Bu, bizim üçün yaxşı dərs oldu. Beynəlxalq Olimpiya Komitəsinin rəhbəri Tomas Bax mənə zəng edərək bildirdi ki, məsələ çox ciddi hal alıb və bunun qarşısı alınmasa, ağır atletika Olimpiadanın proqramından çıxarıla bilər. Onun reaksiyası çox anlaşılandır. İdmançıların qadağan olunmuş maddələr qəbul etməməsi üçün çalışmalıyıq. Dopinqlə mübarizə üçün iki – Təmiz İdman Komissiyası və İdman Proqramı Komissiyası təsis etdim. Bu istiqamətdə görülən işlər nəticə verməsə, ağır atletikanın növbəti Yay Olimpiya Oyunlarında mövcudluğu şübhə altına düşəcək.

Azərbaycanı çox bəyənir və sevirəm. Ən yaxşı milli federasiya rəhbərlərindən biri Cahangir Əsgərovdur. Onun bu istiqamətdə gördüyü işlər fantastikdir. Vitse-prezident Tofiq Heydərov, baş katib Rizvan Rəsulov və digərlərinin gördükləri işlər təqdirəlayiqdir. Yeni idman zallarının açılması, inventarların alınması Azərbaycanda bu idman növünün inkişafına müsbət təsir etməkdədir. Ona görə də Azərbaycanın 1 illik cəza alan 9 ölkə siyahısında olmasına təəssüflənirəm. Azərbaycanı çox yaxşı tərəfdaş kimi görürük. İyunun 11-də Təmiz İdman Komissiyası mənə hesabat verdi ki, Azərbaycan meyarlara tam əməl edib. Ona görə də bu ölkənin yenidən beynəlxalq yarışlara qatılmasına icazə verildi. Bu baxımdan, Azərbaycan cəzası yüngülləşdirilənlər arasında ilk ölkə oldu. Azərbaycan idmançıları Buenos-Ayresdə keçiriləcək Yeniyetmələrin Yay Olimpiya Oyunlarında iştirak edə biləcəklər. Bu, müştərək əməyin nəticəsidir.

Mətbuat konfransının sonunda jurnalistləri maraqlandıran çoxsaylı suallar cavablandırılıb.

– Artıq bir neçə ildir ki, güclü mübarizə başlasa da, daha çox məhz Rusiya və digər MDB ölkələrində dopinq halları baş verir. Söhbət təkcə ağır atletikadan da getmir. Nədənsə, bu prosesdə ABŞ bir qədər kənarda qalır. Sanki onların idmançıları həmişə “təmizdir”. Ağır atletikada Çin idmançıları da böyük uğurlar qazanırlar. Hətta deyilənə görə, orda xüsusi bir qida növləri var ki, dopinqə düşmür, amma gücləndirici effekt verir. Sizə elə gəlmir ki, bu ölkələrin idmançılarına da ayrıca bir nəzarət lazımdır?
– Sualınıza bir qədər ətraflı cavab vermək istəyirəm. Keçmiş SSRİ ölkələrində məşq prosesində hazırlığın bir hissəsi olaraq bu preparatlardan istifadə var idi. Bu da yarışlar zamanı idmançının nəticəsinə təsir edir, gücləndirici effekt verirdi. Özüm də bu sahədə bu tip məsələlərin tədqiqatını etmişəm. Beynəlxalq nəşrlərin də apardığı tədqiqatlar göstərir ki, bu kimi preparatların qəbulu həmin o yarışda nəticəyə hardasa 8-15% təsir edir. Deyək ki, idmançı rahat şəkildə 100 kiloqramı qaldıra bilirdisə, 7-8 kiloqram da preparatların hesabına “əlavə edirdi”. Bu sahənin adamları çox gözəl bilir ki, 100 kq qaldırmaqla, 105 kq və ya 108 kq qaldırmaq arasında nə boyda fərq var. Eyni durum qaçışda, ümumilikdə atletikada da var. Burada cüzi kömək kifayət qədər böyük fərq yaradır. Çəkicatmada normalda 65 metr nəticəsi olan idmançı, preparatla bu rəqəmi 67-68 metrə qaldıra bilir. Üzgüçülükdə də belə hallar var. Növlər çoxdur. Mən keçmiş SSRİ sözünə istinad edirəm, xüsusilə Azərbaycanı nəzərdə tutmuram. Ümumilikdə, bütün dünyada təəccüblənirdilər ki, “sovetlər” necə də çox mütərəqqi, müsbət nəticələr göstərirlər: SSRİ, Çexoslovakiya, Ruminiya, Bolqarıstan, Macarıstan və digərlərinə xas bir məşq metodu idi. Ona görə də sizləri, İttifaq ölkələrini qınamıram. O zamanda Almaniya Demokratik Respublikasına, yaxın qonşu ölkələrdən də həmin o məşqçilər işləməyə dəvət edilirdi və hər dəfə Keçmiş Sovet və Sosialist Bloku ölkələrindən məşqçilərin işlədiyi idman növlərində yarışlarda götürülən qan analizləri “müsbət” nəticə verirdi. Bunları deməkdə məqsədim heç bir vəchlə ovaxtın bütün məşqçilərini qınamaq deyil. Çünki özüm də Macarıstandanam və bizdə də belə idi. Bu, sualınızın birinci hissəsinə cavab idi. O ki qaldı sonrasına, heç də elə bilməyin ki, ABŞ istisnadır,yəni hər hansı bir müqəddəs ölkədir. Biz onların beyzbol idman növündə də götürülən analizlərindən müsbət nəticələr çıxıb. Velosipedçi Lens Armstronqla bağlı məşhur hadisə də hamımıza məlumdur. Bu, onu göstərdi ki, dopinq dünyadakı ümumi problemdir və geniş vüsət alıb. Ona görə də, BOK WADA-nı formalaşdırdı ki, ayrı-ayrı hansısa bir daxili federasiyalar, yaxud beynəlxalq federasiya yox, məhz ali təmsilçilik səviyyəsində Komitə nəzdində belə bir agentlik bu məsələyə nəzarəti tam ciddiyyətlə üzərinə götürsün. Bu minvalla da, bizimdə sizin də qarşılıqlı olaraq müştərək gördüyümüz iş çox vacibdir. Gəlin, bir-birimizi aldatmayaq. Sualınıza görə minnətdaram.
– Mübarizə aparılsa da, dopinqin kökünü kəsmək mümkün olmur. Necə düşünürsüz, yaxın vaxtlarda bu problemi həll etmək mümkün olacaqmı?
– 52 ildir ki, beynəlxalq idman arenasında işləyirəm. Bu müddət ərzində dopinqlərlə bağlı analizlərdə nəticələr olub, indi də göstərir və əfsuslar olsun ki gələcəkdə də bu hal baş verə bilər. Söhbət sadəcə ağır atletikadan getmir, bütün idman növlərində dopinq qaçınılmaz bir haldır. Çünki hər zaman elə idmançılar tapılacaq ki, qızıl medalı boynundan asmaq naminə bu yolu getməyə hazır olacaqlar. Amma inanırıq ki, gələcəkdə aşkarlanan müsbət nəticələrin sayı nəzərəçarpan dərəcədə aşağı düşəcək. Niyə? Müasir laboratoriyaların iş üslubu, texnikası o qədər müasir və o qədər dəqiqdir ki, hətta 10 il əvvəlin dərin dondurma metodu ilə saxlanılan analizlərində qadağan olunmuş preparatları tapa bilir. Pekin və London Olimpiadası ilə bağlı məsələlər buna misaldır. Biz BOK və WADA ilə çox sıx əməkdaşlıq edirik. Yeni qurum da təsis etmişik. İTA adlanır, akronim olaraq unutmayın, beynəlxalq yoxlama qurumudur. Bu yoxlama agentliyi də, BTA-nın da qərargahları da bizimlə Lozannadadır. BOK ilə də, bizimlə də yaxın əməkdaşlıq edəcəklər. Nəhayət, sualın öz cavabına gəlsək, qarşıdakı illərdə nəzərəçarpan azalmanı müşahidə edəcəyimizi istisna etmirəm. Bəli, məhz sadalağım məsələlərin fonunda qeyd etmək istərdim ki, Azərbaycana yenidən gələcəm. Sadəcə ona görə yox ki, bayaq da qeyd etdiyim kimi ölkənizi çox sevirəm.
– Təxminən 7-8 il bundan əvvəl Bakıda beynəlxalq ağır atletika turniri – Bakı Qran-Prisi keçirildi, amma sonradan fasilə verildi. Onun bərpası, Azərbaycanda Dünya Çempionatının keçirilməsi təşəbbüsünə necə baxırsınız? İkinci sualım da var. Azərbaycanda ağır atletikanın inkişafını qeyd etdiniz, amma Azərbaycanda fəaliyyət göstərən Zirvə Beynəlxalq idman klubu da var. Belə bir klubun inkişafına necə kömək edə bilərsiz?
– 6 il əvvəl bu Qran-Pri təşkil edilmişdi. Dünən AAAF prezidenti Cahangir Əsgərovla çox məhsuldar görüşüm oldu və o, yenə blə yarışın keçirilmə niyyətini bəyan etdi. O, məndən smeta və təşkilatı planı istədi. Biz bu istiqamətdə iş aparacaq, lazımi köməyi edəcəyik. Çin də artıq öz istək və niyyətini bildirib, Dünya Kubokunu keçirməkdə maraqlıdırlar, Rusiya da həmçinin. ABŞ-da da təşkil edilməsi yaxşı olardı, çünki yerli federasiya çox fantastik və kifayət qədər fəaldır, təşkilatçılığı ilə seçilir. Təbii ki, yarışın keçirilməsində xüsusi meyarlar var ki, orda xüsusi mükafat fondu mütləq şəkildə ayrılmalıdır və qaliblərə verilməli, üstəlik, atletlərin iştirakı ilə bağlı xüsusi reqlament olmalıdır. Bəli, biz Bakıda Dünya Kubokunu keçirmək istəyirik. İstərdim mətbuat da biraz fəal olsun, bu işdə geniş işıqlandırılmasında bizə kömək etsin. Klub məsələsinə gəlincə, cənab Tofiq Heydərov çox güclü bir klubun prezidentidi. Yaxın həftələrdə bizim görüşlərimiz nəzərdə tutulub. Bilirəm,ağır atletika ilə bağlı həddindən artıq çox entuziazm, həvəsi ilə seçilən adamdır. Şəxsən özüm də tanıyıram, tanınmış bir idmançı olub. Yadınıza gəlir, bayaq dedim ki, Azərbaycanın kifayət qədər yaxşı, istedadlı, ağır atlet keçmişi olan kadrılar var. Onlarla işləmək bizim üçün zövqdür.
– Son vaxtlar 4 idmançımızı dopinqə “düşüb”. Onlardan biri – İsa Rüstəmov haqqında qərar açıqlandı ki, 4 illik cəzalandırıldı. Amma digər 3 idmançı – Elmar Alıyevi saymasaq, Hüseyn İsmayılov və Anastasiya İbrahimli barəsində qərar açıqlanmayıb. Bu, nə ilə əlaqədardır?
– Bu, sırf ölkədaxili məsələdir. Burada prosedur qaydaları, reqlament var, işin ühquqi tərəfləri var. Bütün bu proseslər tam başa çatmalıdır ki, qərar açıqlansın. Bir məsələni də qeyd edim: əfsuslar olsun ki, İslam Oyunları zamanı da ərəb ölkələrində keçmiş SSRİ-dən məşqçilər cəlb olunmuş, onlar da yüksək nəticə üçün idmançılara qadağan olunmuş preparatlar verdilər. Çox təəssüf. Nəticə isə göz qabağındadır. Suala qayıtsaq, belə dəqiq heç nə deyə bilmərəm. Prosedur başa tam çatmalıdır. Dopinq olanda cəza idmançı və məşqçisinə, iş kütləvi hal alarsa, hətta ölkə özü idman yarışlarından uzaqlaşdırıla bilər. Rəsmi məktubla müraciət edin, hüquqşünaslarımız bu məsələyə öz cavablarını mütləq bildirərlər.
– Bildiyiniz kimi, biz bir il müddətinə uzaqlaşdırılmışdıq. Bu bir il ərzində bizim idmançılar üç dəfə dopinq kontrolundan keçməli idilər. Ancaq bizim iyul ayında cəzamız qurtardı. Elə idmançılarımız var ki, hansı ki, cəmi bir, ya iki dəfə analiz verib. Onlar yarışa buraxılacaqlarmı?
– Fərq etməz, üçüncü dəfə analiz omayıbsa və əgər müddət bitibsə, bəli, iştirak edə bilər.
– 2019-cu ildə Belarusiyada keçirilən Avropa Oyunlarında Ağır atletika idman növü olacaqmı?
– Xeyr. İlk Avropa Oyunları Bakıda fantastik keçirildi. Ancaq əfsuslar olsun ki, Avropa Federasiyası yüksək səviyyədə işləmir.Ona görə də ağır atletika ora daxil edilmədi. Minskdə də olmayacaq.
– AAAF barədə xoş sözlər söylədiz, bütün meyarların qəbul və riayət edildiyini dediniz. Qız atletimizin Yeniyetmələrin Olimpiya Oyunlarında iştirakını bunun əvəzində bir jest kimi qəbul edə bilərikmi? Və həmkarımın sualının davamı olaraq, təbii ki, dünya çempionatı və yaxud daha böyük yarışlardan danışırıq, amma nəzərə almalıyıq ki, Azərbaycan federasiyası tam sıfırdan yeni işlər görməyə başlayıb. Ola bilərmi ki, DÇ-yə qədər hər hansı mötəbər tədbirlər məsələn, Avropa çempionatı Azərbaycana etibar edilsin?
– Problem yoxdur. Federasiyanın belə bir ixtiyarı var. Oktyabrın 19-da bütün ölkələrin cəza müddəti bitir. Bəli, artıq azad olacaqsız. Bilavasitə iştirak etməkdə, təşkil etməkdə Azərbaycan birmənalı səlahiyyətə malik olacaq. Heç bir problemsiz, sabah belə Azərbaycan beynəlxalq yarışlarda iştirak edə, ardınca da bütün işlər düzgün qurulsa, yarış təşkilini də edə bilər. Bunu dünən Cahangir Əsgərov, Tofiq Heydərov və Rizvan Rəsulovla müzakirə etdik. Müsbət fikirlər söylənildi, gələcəyə ümid və inamla baxmaq imkanımız yarandı. Azərbaycana uğurlar arzulayır, görülən bütün işlərdən razılığımı ifadə edir, gələn görüşlərə qədər deyirəm.

The requested album cannot be loaded at this time. Error: OAuthException Code: 200, (#200) Missing Permissions

Atletlərimizin Milandakı bütün çıxışlarının videoları

Kenan Mesteliyev — Fri, 03 Aug 2018 07:49:30 +0000

22-29 iyul tarixlərində İtaliyanın Milan şəhərində keçirilən 15 və 17 yaşa qədər yeniyetmə oğlan və qızlar arasında ağır atletika üzrə Avropa birinciliyində iştirak edən Azərbaycan yığma komandasının bütün üzvlərinin çıxışlarının videoyazısını təqdim edirik. Müvafiq idmançının videosunu izləmək üçün adının üzərinə tıklayın:

Günel Muxtarlı
Selcan Qarayeva
Elvin Şükürzadə
Ömər Cavadov
Fuad Həsənov
Elşən Məmmədov
Murad Əliyev
Kamil Nəbiyev
Fazilə İmanova
Sale Alxasov
Elməddin Hüseynov
Rüstəm Qasımov
Anna Opanasyuk
Fidan Mirzəzadə
Səma Mayılova
Füqan Əliyev
Yaşar Mamayev
Rahilə Hüseynova
Əlimərdan Alxasov
İsmayıl Baxışov
Lalə Rzazadə
Əli Quliyev
Əli Şükürlü
Fidan Hüseynzadə
Tarmenxan Babayev

Hesabat iclası keçirilib

Kenan Mesteliyev — Wed, 19 Jul 2017 07:47:21 +0000

Dünən AAAF Park Yaşayış Kompleksinin konfrans zalında Azərbaycan Ağır Atletika Federasiyasının (AAAF) 6 aylıq hesabat iclası keçirilib. Federasiyanın Rəyasət Heyətinin üzvlərinin iştirak etdiyi tədbirdə qurumun 2017-ci ilin ilk yarısında gördüyü işlər, həyata keçirdiyi layihələr, əldə edilən uğurlar barədə danışılıb, rəsmi şəxslərin hesabat xarakterli çıxışları dinlənilib.
Tədbiri Azərbaycan Gənclər və İdman Nazirinin müavini, AAAF-ın vitse-prezidenti İsmayıl İsmayılov açıb. O, ölkəmizdə ağır atletikanın son zamanlar böyük populyarlıq qazandığını, sevilən idman növlərindən birinə çevrildiyini deyib. İsmayılov deyib ki, federasiya dopinqlə mübarizəyə böyük diqqət ayırır, böyük çalışmalar edilir. Onun fikrincə, ağır atletika kollektivi hər gün möhkəmlənən böyük bir ailədir. Vitse-prezident bu tədbirin arxada qalan 6 aydakı fəaliyyətə həsr olunduğu bildirib və sözü federasiyanın baş katibi Rizvan Rəsulova verib.
Rəsulov çıxış edərək AAAF-ın 2017-ci ilin ilk yarısındakı fəaliyyəti haqda geniş məlumat verib. Baş katib qeyd edib ki, hesabat dövründə milli komandalarımız bir neçə beynəlxalq yarışda iştirak edərək uğur əldə ediblər: “Yığmalarımız İrandakı 2-ci Fəcr Kuboku, Tailandda keçirilən yeniyetmələr arasında dünya birinciliyi, Tokioda keçirilən gənclər arasında dünya çempionatı və IV İslam Oyunlarında körpücük üzərinə çıxıblar. Bu yarışlarda atletlərimiz 2 qızıl, 2 gümüş və 4 bürünc medal əldə etməyi bacarıblar. Tailanddakı yarışda milli komandamızın tarixdə ilk dəfə Yeniyetmələrin Olimpiya Oyunlarına lisenziya qazanması isə xüsusi fəxrlə qeyd olunmalıdır. Bununla yanaşı, AAAF və AGİN təsdiq olunmuş təqvim planına uyğun olaraq yeniyetmə, gənclər və böyüklər arasında Respublika, iki seçmə mərhələ yarışlarını, həmçinin XI Respublika Oyunlarını təşkil edərək, ümumilikdə mindən çox atletin iştirakını təmin edib. Beynəlxalq yarışlara hazırlıq məqsədilə həm ölkə daxili, həm də xaricində təlim-məşq toplanışı keçirib, ən yaxşı şəraitlə təmin ediliblər”. Daha sonra Rəsulov federasiyanın maliyyə hesabatını açıqlayıb, gəlir və xərclər barədə məlumat verib. Bununla yanaşı, baş katib qeyd edib ki, AAAF dopinqlə mübarizəyə böyük diqqət ayırır, məsələnin ciddiliyini anlayaraq fasiləsiz tədbirlər həyata keçirir. Bunların arasında mütəmadi maarifləndirmənin aparılması, daxili dopinq-testlərin götürülməsi, dispanserizasiya və vitaminizasiyanın təşkili, qidalanmaya nəzarət, xüsusi bərpa və reabilitasiya mərkəzlərində müalicənin təmini və s. göstərmək olar.
Daha donra söz AAAF-ın vitse-prezidenti Ruslan Xanverdiyevə verilib. O, federasiyanın əsasən infrastruktur fəaliyyəti barədə geniş danışıb: “Bu 6 ay ərzində əsas istiqamət kimi regionlarda zalların əsaslı təmir işləri və yeni zalların inşa edilməsini götürmüşdük. Qobustan şəhər gənclər və idman məktəbinin ağır atletika zalı, Təhsil Respubilka idman mərkəzinin Suraxanı ağır atletika zalı, Şamaxı rayonu Qaleybuğurd kəndi ağır atletika zalı, Ramanı qəsəbəsi ağır atletika zalı, Mərkəzi Ordu İdman Klubunun ağır atletika zalı, Azərbaycan Dövlət Bədən Tərbiyəsi və İdman Akademiyasının ağır atletika zalı və Lerik rayonu Piran kəndi ağır atletika zalında təmir-bərpa işləri aparılıb, Astarada ən müasir tələblərə cavab verən ağır atletika təlim-məşq bazası tikilib, istifadəyə verilib. Sumqayıt və Bakı şəhərlərində yeni zalların açılması üçün işlər aparılmaqdadır. Ehtiyacı olan bütün zallar 2017-ci ilin ikinci 6 ayında lazımi avadanlıqlarla təmin ediləcəkdir. Regionlarda zalların açılması, onlarda təmir işləri və avadanlıqların təmin edilməsində federasiyamızın bir neçə ana məqsədi var. Bunlar regionlarda məşqçi və idmançıların məşq etməsi üçün lazım olan şəraitlə təmin edilməsi, ölkədə ağır atletika idman növünün yayılması və təbliğatı, ağır atletika idman növünə bütün regionlardan ən potensiallı yeniyetmələrin cəlb edilməsi, Azərbaycanda ağır atletika məktəbinin gücləndirilməsi, ölkədə idman və sağlam həyat tərzinin gənclər və uşaqlar arasında yayılmasıdır.
Növbəti 6 ayı üçün yenə də aktiv fəaliyyət planlarımız var və mövcud zallarda əsaslı təmir işlərinin aparılması, ağır atletika zalı olmayan regionlarda yeni zalların istifadəyə verilməsi, zalların müasir avadanlıqlarla təmin edilməsi, Azərbaycan ağır atetika idman növünün arxivinin yaradılması, Azərbaycan ağır atetika idman növünün tarix müzeyinin qurulmasını nəzərdə tutmuşuq. Bu işlərin aparılmasında başda AAAF İnşaat olmaqla AAAF Holdinqin bütün şirkətləri cəlb edilmişdir. Fürsətdən istifadə edərək ulu öndər Heydər Əliyevin əsasını qoyduğu idmana böyük qayğı və dəstək siyasətinin davam edilməsinə görə ölkə başçımız və Milli Olimpiya Komitəsinin Prezidenti Cənab İlham Əliyevə, AAAF Prezidenti Cənab Cahangir Əsgərova, AAAF-ın vitse prezidentləri Azər Əliyev, İsmayıl İsmayılov və Tofiq Heydərova dərin minnətdarlığımı bildirirəm”.
Tədbir zamanı AAAF-ın sabiq prezidenti Şüa Hüseynov, hakimlər Vahid Nəzərov və Qadir Babayev, AAAF Rəyasət Heyətinin üzvü Fəxri Ağayev də çıxış edərək öz rəy və təkliflərini bildiriblər.
Sonda Bakıda keçirilən IV İslam Oyunlarında fərqlənən atletlər və onların məşqçiləri federasiya tərəfindən mənzil sertifikatları və pul mükafatları ilə təltif olunublar. Federasiya yarışın təşkilində əməyi keçən bütün digər əməkdaşlarını da unutmayaraq onların zəhmətini pul mükafatı ilə qiymətləndirib.

The requested album cannot be loaded at this time. Error: OAuthException Code: 200, (#200) Missing Permissions

Seçmə mərhələ yarışlarına start verildi

Kenan Mesteliyev — Mon, 03 Jul 2017 11:08:59 +0000

1 iyul tarixində Azərbaycanın bütün bölgələrini əhatə edən ağır atletika üzrə Respublika yarışlarının 3-cü seçmə mərhələsinə Abşeronda start verilib. AAAF Park Yaşayış Kompleksinin yarış zalında Sumqayıt, Xırdalan, Qobustan, Şamaxı, İsmayıllı və Bakıdan olan atletlər mübarizəyə qoşulublar. İki gün ərzində 100-ə yaxın ağır atlet körpücük üzərində qüvvəsini sınayıb.
Yarışların keçirilməsində məqsəd regionlarda atletlərin hazırlıq durumlarının yoxlanılması, ehtiyat qüvvənin nəzərdən keçirilməsi, güclü idmançıların seçilməsi, ağır atletika idman növünün şəhər, rayon, qəsəbə və kəndlərdə təbliği və inkişafı, idmançılar və məşqçılər arasında dostluq əlaqələrinin möhkəmləndirilməsi, idmançıların ustalıq səviyyəsinin artırılması və təkmilləşdirilməsi olduğunu bildirib.
Mərhələ yarışları çərçivəsində 5-6 iyul tarixlərində Lənkəranda Cəlilabad, Neftçala, Lənkəran, Lerik və Astaranı, 8-9 iyulda isə Samuxda Goranboy, Gəncə, Yevlax, Samux, Qazax, Şəki və Qaxı təmsil edən atletlər körpücük üzərinə çıxacaqlar.
Yarış şəxsi xarakter daşıyır və iştiraka yalnız texniki cəhətdən hazırlıqlı, yaşı ən azı 10 olan idmançılar buraxılacaqlar. İdmançıların çəkilməsi hər yarış günü səhər saat 09:00-da olacaqdır. Zona turnirində 2007, 2006, 2005, 2004, 2003, 2002, 2001, 2000, 1999-cü il və daha böyük təvəllüdlü kişilər və qadınlar, müvafiq yaş qruplarında mübarizə aparacaqlar, qaliblər Sinkleyr cədvəli üzrə müəyyən ediləcəkdir.
Seçmə mərhələ yarışları təqvim planına əsasən 3 zona üzrə ildə 4 dəfə keçiriləcəkdir.

Abşeron zonası üzə nəticələrlə aşağıdakı linkdə tanış ola bilərsiniz:

ABSERON 3

The requested album cannot be loaded at this time. Error: OAuthException Code: 200, (#200) Missing Permissions