Arxiv – Azərbaycan Ağır Atletika Federasiyası

AAF-ın Texniki Komitəsinin iclası keçirilib

Mehman Rasulov — Fri, 07 Feb 2025 14:29:46 +0000

Azərbaycan Ağırlıqqaldırma Federasiyasının mənzil-qərargahında federasiyanın Texniki Komitəsinin iclası keçirilib. AAF-ın vitse-prezidenti Firdovsi Umudovun rəhbərliyi ilə baş tutan toplantıda 25-26 yanvar 2025-ci il tarixində keçirilmiş Azərbaycan çempionatının hesabatı dinlənilib. İclasda hakimlərə lisenziyaların verilməsi, onların peşəkarlığının artırılması istiqamətində fikir mübadiləsi aparılıb. Daha sonra mart ayında təşkil olunacaq yeniyetmələrin ölkə birinciliyinə ilkin hazırlıqlarla bağlı müvafiq tapşırıqlar verilib.

Azərbaycan çempionatına yekun vurulub

Mehman Rasulov — Mon, 27 Jan 2025 09:35:43 +0000

25-26 yanvar tarixlərində keçirilən ağırlıqqaldırma üzrə Azərbaycan çempionatına yekun vurulub. Son yarış günündə kişi atletlər qalib və mükafatçıların adlarına aydınlıq gətiriblər.

55 kq çəki dərəcəsində Səid Mahmudov toplamda 171 kq (76 kq+ 95 kq) nəticə ilə çempion adını qazanıb. Feyzulla Rüstəmov toplamda 168 kq (74 kq + 94 kq) nəticə ilə ikinci olub. Rəhman Mərdəliyev toplamda 164 kq (73 kq+ 91 kq) nəticə ilə ən güclü üçlüyü tamamlayıb.

61 kq çəki dərəcəsində Amin Osmanov toplamda 231 kq (105 kq+126 kq) nəticə ilə çempion adını qazanıb. Murad Həsənli toplamda 220 kq (100 kq+120 kq) nəticə ilə ikinci olub. Canpolad Rəfiyev toplamda 211 kq (90 kq+121 kq) nəticə ilə ən güclü üçlüyü tamamlayıb.

67 kq çəki dərəcəsində Tehran Məmmədov toplamda 277 kq (125 kq+152 kq) nəticə ilə çempion adını qazanıb. Elşan Məmmədov toplamda 268 kq (125 kq + 143 kq) nəticə ilə ikinci olub. Fuad Həsənov toplamda 256 kq (121 kq+ 135 kq) nəticə ilə ən güclü üçlüyü tamamlayıb.

73 kq çəki dərəcəsində İsa Rüstəmov toplamda 328 kq (146 kq+182 kq) nəticə ilə çempion adını qazanıb. Paşa İbrahimli toplamda 305 kq (145 kq + 160 kq) nəticə ilə ikinci olub. Qasım İsmayılov toplamda 277 kq ( 121 kq+ 156 kq) nəticə ilə ən güclü üçlüyü tamamlayıb.

81 kq çəki dərəcəsində Elxan Əliquluzadə toplamda 325 kq (155 kq+ 170 kq) nəticə ilə çempion adını qazanıb. Ravin Alməmmədov toplamda 305 kq (145 kq + 160 kq) nəticə ilə ikinci olub. Dilavər Süleymanov toplamda 235 kq ( 105 kq+ 130 kq) nəticə ilə ən güclü üçlüyü tamamlayıb.

89 kq çəki dərəcəsində Nurlan Rəsulov toplamda 330 kq (145 kq+ 185 kq) nəticə ilə çempion adını qazanıb. Orxan Zöhrabzadə toplamda 296 kq (131 kq + 165 kq) nəticə ilə ikinci olub. Ruslan Həsənov toplamda 272 kq ( 127 kq+ 145 kq) nəticə ilə ən güclü üçlüyü tamamlayıb.

96 kq çəki dərəcəsində Nurlan Məmmədzadə toplamda 290 kq (130 kq+ 160 kq) nəticə ilə çempion adını qazanıb. Aslan Əmiraslanov toplamda 275 kq (120 kq + 155 kq) nəticə ilə ikinci olub.

102 kq çəki dərəcəsində Məmməd Əhmədzadə toplamda 282 kq (125 kq+ 157 kq) nəticə ilə çempion adını qazanıb. Mürsəl Quliyev toplamda 240 kq (105 kq + 135 kq) nəticə ilə ikinci olub.

+109 kq çəki dərəcəsində Azər Məmmədli toplamda 330 kq (150 kq+ 180 kq) nəticə ilə çempion adını qazanıb.

Ölkə miqyaslı yarışın ən yaxşı kişi idmançısı adını İsa Rüstəmov qazanıb. Ən yaxşı qadın idmançı adına isə Rahilə Hüseynova layiq görülüb.

Azərbaycan çempionatının yekunlarına əsasən ən yaxşı kişi və qadın komandalarının da adlarına aydınlıq gəlib:

Kişi komandaları

1-ci yer: Qazax

2-ci yer: Lənkəran

3-cü yer: Abşeron

Qadın komandaları:

1-ci yer: Qazax

2-ci yer: Lənkəran

3-cü yer: İsmayıllı

Qeyd edək ki, Azərbaycan çempionatında ümumilikdə 100-ə yaxın idmançı mübarizə aparıb.

Daha 5 çəki dərəcəsində medalçılar müəyyənləşib

Mehman Rasulov — Sun, 26 Jan 2025 13:34:15 +0000

25-26 yanvar tarixlərində keçirilən ağırlıqqaldırma üzrə Azərbaycan çempionatı kişi atletlərin yarışı ilə davam edib. İkinci yarış günü daha 5 çəki dərəcəsində qalib və mükafatçıların adlarına aydınlıq gəlib.

İdmançılara mükafatları Azərbaycan Ağırlıqqaldırma Federasiyasının prezidenti Kamran Nəbizadə və AAF-ın İdarə Heyətinin üzvləri Maksim Cavadovla Fəxri Mehdiyev təqdim ediblər.

Azərbaycan çempionatının rəsmi açılış mərasimi baş tutub

Mehman Rasulov — Sat, 25 Jan 2025 14:08:08 +0000

25-26 yanvar tarixlərində keçirilən ağırlıqqaldırma üzrə Azərbaycan çempionatının rəsmi açılış mərasimi baş tutub. Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra ölkəmizin suverenliyi uğrunda canından keçmiş qəhrəmanlarımızın əziz xatirəsi bir dəqiqəlik sükutla yad edilib. Açılış mərasimində çıxış edən AAF-ın vitse-prezidenti Firdovsi Umudov dövlət tərəfindən idmançılar üçün hər bir şəraitin yaradıldığını qeyd edərək, yarışda iştirak edən atletlərə uğurlar arzulayıb. Tədbir zamanı yaxın günlərdə 80 yaşını qeyd etmiş Əməkdar məşqçi Vaqif Hüseynova federasiya tərəfindən xatirə hədiyyələri təqdim edilib. Yubilyara can sağlığı, uzun ömür arzulanıb. Vaqif Hüseynov öz növbəsində veteranlara göstərilən diqqətə görə federasiya rəhbərliyinə minnətdarlığını ifadə edib.

Vaqif Hüseynov Gənclər və İdman İdarəsi tərəfindən də mükafatlandırılıb. Hədiyyəni yubilyara beynəlxlaq dərəcəli hakim Azad Mustafayev təqdim edib.

Azərbaycan çempionatında qadın atletlərin mübarizəsinə yekun vurulub

Mehman Rasulov — Sat, 25 Jan 2025 13:21:02 +0000

25 yanvar tarixində ağırlıqqaldırma üzrə Azərbaycan çempionatına start verilib. Qadın atletlər daha 6 çəki dərəcəsində mükafatçıların adlarına aydınlıq gətiriblər.

64 kq çəki dərəcəsində çıxış etmiş Lalə Əzizli birdən qaldırma hərəkətində 59 kq nəticə göstərib. Təkanla qaldırma hərəkətində 68 kq ağırlığın öhdəsindən gələn Lalə toplamda 127 kq nəticə ilə çempion olub. Bu çəki dərəcəsində ikinci yeri Nigar Əliyeva tutub. O, toplamda ( 55 kq+65 kq) 120 kq nəticə göstərib. Bu çəki dərəcəsində bürünc medalı Xeyransa İbrahimli qazanıb. O, toplamda (40 kq+ 45kq ) 85 kq nəticəyə imza atıb.

Qadınların yarışında 71 kq çəki dərəcəsində Aytən Əliyeva birdən qaldırma hərəkətində 68 kq nəticə göstərib. Təkanla qaldırma hərəkətində 85 kq ağırlığın öhdəsindən gələn atlet toplamda 153 kq nəticə ilə birinci olub. Bu çəki dərəcəsində ikinci yeri Xanımana Əhmədova tutub. O, toplamda ( 50 kq+ 68 kq) 118 kq nəticə göstərib. Ən güclü üçlüyü Aydan Vahidova (51 kq + 66 kq) 117 kq nəticə ilə tamamlayıb.

Qadınların yarışında 76 kq çəki dərəcəsində Arzu Qədimova birdən qaldırma hərəkətində 60 kq nəticə göstərib. Təkanla qaldırma hərəkətində 70 kq ağırlığın öhdəsindən gələn atlet toplamda 130 kq nəticə ilə birinci olub.

Qadınların yarışında 81 kq çəki dərəcəsində Rahilə Hüseynzadə birdən qaldırma hərəkətində 75 kq nəticə göstərib. Təkanla qaldırma hərəkətində 90 kq ağırlığın öhdəsindən gələn atlet toplamda 175 kq nəticə ilə birinci olub.

Qadınların yarışında 87 kq. çəki dərəcəsində Ələmgül Yusifzadə birdən qaldırma hərəkətində 35 kq nəticə göstərib. Təkanla qaldırma hərəkətində 50 kq ağırlığın öhdəsindən gələn atlet toplamda 85 kq nəticə ilə birinci olub.

Qadınların yarışında +87 kq. çəki dərəcəsində Mələk Hüseynli birdən qaldırma hərəkətində 52 kq nəticə göstərib. Təkanla qaldırma hərəkətində 65 kq ağırlığın öhdəsindən gələn atlet toplamda 117 kq nəticə ilə birinci olub. Bu çəki dərəcəsində ikinci yeri Zəhra Qəmbərzadə tutub. O toplamda 78 kq (33 kq+ 45 kq) nəticə göstərib.

4 çəki dərəcəsində qalib və mükafatçılar müəyyənləşib

Mehman Rasulov — Sat, 25 Jan 2025 09:33:09 +0000

25 yanvar tarixində ağırlıqqaldırma üzrə Azərbaycan çempionatına start verilib. İlk olaraq mübarizəyə qadın atletlər qoşulub. 45 kq çəki dərəcəsində Nuray Əbilova birdən qaldırma hərəkətində 51 kq nəticə göstərib. Təkanla qaldırma hərəkətində 60 kq ağırlığın öhdəsindən gələn Nuray toplamda 111 kq nəticə ilə çempion olub. Bu çəki dərəcəsində ikinci yeri Samirə Rzayeva tutub. O, toplamda ( 38 kq+ 40 kq) 78 kq nəticə göstərib.

Qadınların yarışında 49 kq. çəki dərəcəsində Nazilə Məmmədova birdən qaldırma hərəkətində 55 kq nəticə göstərib. Təkanla qaldırma hərəkətində 70 kq. ağırlığın öhdəsindən gələn atlet toplamda 125 kq nəticə ilə birinci olub. Bu çəki dərəcəsində ikinci yeri Aydan Rzayeva tutub. O, toplamda ( 45 kq+ 55 kq) 100 kq nəticə göstərib.

Qadınların yarışında 55 kq çəki dərəcəsində Selcan Qarayeva birdən qaldırma hərəkətində 58 kq nəticə göstərib. Təkanla qaldırma hərəkətində 73 kq ağırlığın öhdəsindən gələn atlet toplamda 131 kq nəticə ilə birinci olub. Bu çəki dərəcəsində ikinci yeri Türkanə Qəmbərzadə tutub. O, toplamda (45 kq+ 51 kq) 96 kq nəticə göstərib. Ən güclü üçlüyü Ravilya Abbasova tamamlayıb. O, toplamda (40kq + 50 kq ) 90 kq nəticəyə imza atıb.

Qadınların yarışında 59 kq çəki dərəcəsində Dinara İbrahimli birdən qaldırma hərəkətində 55 kq nəticə göstərib. Təkanla qaldırma hərəkətində 76 kq ağırlığın öhdəsindən gələn atlet toplamda 131 kq nəticə ilə birinci olub. Bu çəki dərəcəsində ikinci yeri Türkanə Eminova tutub. O, toplamda ( 51 kq+ 60 kq) 111 kq nəticə göstərib. Bahar Ocaqverdiyeva toplamda (45 kq+50 kq) 95 kq göstərici ilə üçüncü olub

AAF “2024-cü ildə uğurlu beynəlxalq fəaliyyətə görə” nominasiyasında 3-cü yeri tutub

Mehman Rasulov — Fri, 10 Jan 2025 06:30:38 +0000

Gənclər və İdman Nazirliyi ilin idman yekunları ilə bağlı qala mərasimi təşkil edib. Tədbirə idman təşkilatlarının, federasiyaların, media qurumlarının rəhbərləri, idmançılar, məşqçilər və idman ictimaiyyətinin nümayəndələri qatılıblar. Heydər Əliyev Fondunun vitse-prezidenti Leyla Əliyeva və Bakı Media Mərkəzinin rəhbəri Arzu Əliyeva da mərasimdə iştirak ediblər.

İlk olaraq Gənclər və idman naziri Fərid Qayıbov 2024-cü ilin Azərbaycan idmanı üçün uğurlu keçdiyini qeyd edib və bu münasibətlə federasiya rəhbərlərini, idmançıları, məşqçiləri, idman ictimaiyyətini təbrik edib.

Azərbaycan Ağırlıqaldırma Federasiyasının prezidenti Kamran Nəbizadə, vitse-prezident Firdovsi Umudov və son dünya çempionatının gümüş mükafatçısı Dadaş Dadaşbəylinin də dəvət olunduğu tədbirdə AAF-ın fəaliyyəti də qiymətləndirilib.

Seçimlərə əsasən Azərbaycan Ağırlıqqaldırma Federasiyası “2024-cü ildə uğurlu beynəlxalq fəaliyyətə görə” nominasiyasında 3-cü yeri tutub.

Təbrik edirik!

İsa Rüstəmov “Kakhi Cup 2024” beynəlxalq turnirinin qalibi adını qazanıb

Mehman Rasulov — Sat, 28 Dec 2024 13:22:44 +0000

Atletimiz İsa Rüstəmov (73 kq) Gürcüstanın paytaxtı Tbilisi şəhərində keçirilən “Kakhi Cup 2024” beynəlxalq turnirinin qalibi adını qazanıb. Təmsilçimiz birdən qaldırma hərəkətində 148 kq, təkanla qaldırma hərəkətində isə 181 kq ağırlığı başı üzərinə qaldırıb. İsa Rüstəmov toplam çəkidə 329 kq (148+181) nəticə ilə yarışı birinci pillədə başa vurub.

İsa Rüstəmov uğurlu çıxışı ilə bağlı AAF-ın rəsmi saytına açıqlama verib: Bildiyiniz kimi dünya çempionatından yeni qayıtmışıq. İstirahət üçün ümumiyyətlə vaxtımız olmadı. Federasiya rəhbərliyi bu yarışda iştirakıma hər cür şərait yaratdı. Bütün yanaşmaları uğurla icra edərək, ili qızıl medalla başa vurdum. Bir neçə gün əvvəl baş vermiş ağır təyyarə qəzası hamımızı sarsıtdı. Qələbəmi qəhrəman təyyarə ekipajına və qəzada həlak olmuş sərnişinlərin əziz xatirəsinə həsr edirəm”.

Qeyd edək ki, “Kakhi Cup 2024” beynəlxalq turniri çərçivəsində qonşu ölkəyə səfər etmiş Azərbaycan Ağırlıqqaldırma Federasiyasının vitse-prezidenti Firdovsi Umudov, Gürcüstan Ağırlıqqaldırma Federasiyasının prezidenti, 3 qat Olimpiya çempionu Kaxi Kaxiaşviliyə AAF adından xatirə hədiyyəsini təqdim edib.

Azərbaycan Sənaye Korporasiyası və Azərbaycan Ağırlıqqaldırma Federasiyası ilin yekunlarına dair tədbir keçirib

Mehman Rasulov — Tue, 24 Dec 2024 16:54:57 +0000

Azərbaycan Sənaye Korporasiyası və Azərbaycan Ağırlıqqaldırma Federasiyası ilin yekunlarına dair tədbir keçirib. Mərasim Azərbaycan Respublikasının Dövlət Himninin səsləndirilməsi və ərazi bütövlüyümüz uğrunda canından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Daha sonra Azərbaycan Sənaye Korporasiyasının baş direktoru və AAF-ın prezidenti Kamran Nəbizadə giriş sözü ilə çıxış edib. Federasiyanın 2024-cü ildə qazandığı nailiyyətlərdən danışan Kamran Nəbizadə, idmana dövlət səviyyəsində böyük diqqət və qayğının göstərildiyini vurğulayıb. O, ağırlıqqaldırma növündə qarşıya böyük hədəflərin qoyulduğunu xatırladaraq, cari ildə qazanılmış uğurların davamlı olacağına inandığını ifadə edib.
Daha sonra çıxış üçün söz, Azərbaycan Ağırlıqqaldırma Federasiyasının vitse-prezidenti Firdovsi Umudova verilib. Firdovsi Umudov bu il Beynəlxalq və Avropa Ağırlıqqaldırma Federasiyalarının prezidentlərinin ölkəmizə səfərlərini xatırladıb. O qeyd edib ki, Avropa Ağırlıqqaldırma Akademiyasına ev sahibliyinin Azərbaycana verilməsində, adı çəkilən qurumlarla beynəlxalq əlaqələrin peşəkar səviyyədə qurulmasının böyük rolu olub.
Daha sonra 2024-cü ildə fərqlənmiş idmançı və məşqçilərə müxtəlif nominasiyalar üzrə mükafatlar təqdim edilib.
Bu il Avropa çempionu adını qazanmış, dünya çempionatının gümüş medalına sahib olmuş yığma komandamızın lideri, Dadaş Dadaşbəyli “İlin idmançısı” adına layiq görülüb.
Onun yarışlara hazırlanmasında xüsusi əməyi olan yığma komandanın böyük məşqçisi Asif Məmmədova “İlin məşqçisi” nominasiyası təqdim edilib.
Yığma komandanın baş məşqçisi Maxtı Makkayev federasiyadakı səmərəli fəaliyyətinə görə fərqlənib.
Dadaş Dadaşbəylinin şəxsi məşqçisi Şəmsi Səfərli isə ağırlıqqaldırma idman növünün inkişafındakı xidmətlərinə görə mükafatlandırılıb.

AAF-ın prezidenti Kamran Nəbizadə strateji planlama mütəxəssisi, professor Edvard Kolarla görüşüb

Mehman Rasulov — Thu, 19 Dec 2024 11:05:56 +0000

Azərbaycan Ağırlıqqaldırma Federasiyasının prezidenti Kamran Nəbizadə Sloveniyadan olan strateji planlama mütəxxəsisi, Lyublyana Universitetinin professoru Edvard Kolarla görüşüb. Gənclər və İdman Nazirliyinin İdman şöbəsinin müdiri Elnur Məmmədov, AAF-ın vitse-prezidenti Firdovsi Umudov və beynəlxalq əlaqələr şöbəsinin müdiri Elnarə Təhməzovanın iştirak etdiyi görüşdə, Azərbaycanda qurulacaq Avropa Ağırlıqqaldırma Akademiyasının inkişaf strategiyası müzakirə edilib. AAF-ın prezidenti Kamran Nəbizadə akademiyanın inkişaf strategiyasının hazırlanması zamanı nəzərə alınmalı zəruri istiqamətləri diqqətə çatdırıb. Federasiya prezidenti vurğulayıb ki, Akademiyanın fəaliyyət və inkişaf strategiyasında bu idman növünün kütləviləşməsi, atletlər və hakimlər üçün beynəlxlaq seminar və məşğələlərin təşkili, sertifikatlaşdırma, eyni zamanda antidopinq sahəsində görüləcək işlər ayrı-ayrılıqda nəzərə alınmalıdır.

Daha sonra sloveniyalı mütəxəssis Edvard Kolar effektiv inkişaf strategiyasının təklif olunmuş istiqamətləri ilə bağlı fikirlərini səsləndirib. O, qısa zamanda strategiyanın ilkin versiyasını Azərbaycan Ağırlıqqaldırma Federasiyasına təqdim edəcəklərini bildirib. Görüş qarşılıqlı fikir mübadiləsi ilə davam edib. Qeyd edək ki, inkifaş strategiyası hazırlandıqdan sonra Beynəlxalq Ağırlıqqaldırma Federasiyasına təqdim ediləcək.